डोळे, संपुर्ण व्यक्तिमत्वात लक्षात राहतात असे.डोळे खूप बोलतात आणि असे बोलतात जे कधी कधी शब्दही सांगू शकत नाहीत.तशाच आशयाची एक कविता "नजर".खूप पाहिलेल्या नजरा आणि त्याच्या वेगवेगळ्या छटा सांगणारी.
नजर
अशी एक नजर जिने केला कहर
भाषा साऱ्या शरण आल्या करताना भाषांतर
अशी एक नजर जिने केला कहर
भिनत गेली अशी जसं भिनत जावं जहर
अशी एक नजर जसा फुटे मायेस पाझर
कोडग्या डोळा पाणी यावं दाटून यावा स्वर
अशी एक नजर जिने केला कहर
पाहता क्षणी गळून पडलं सारं एकवटलं बळ
अशी एक नजर जिने केला कहर
झाली नजरानजर दिसते तीच तिन्ही प्रहर
अशी एक नजर जिने केला कहर
मोहरून गेली स्वप्नं आला आयुष्याला बहर
अशी एक नजर जिने केला कहर
इतकी मिश्कील खट्याळ जशी विनोदाची लहर
अशी एक नजर जिने केला कहर
केविलवाणी,भुकेली मागते एक तुकडा भाकर
अशी एक नजर जिने केला कहर
अमानवी इतकी, काटा येई अंगावर
अशी एक नजर जिने केला कहर
करारी तेजस्वी सत्यवचनी प्रखर
अशी एक नजर भिरभिरती चंचल
न थारा आकाशी न टिके ती भुईवर
अशी एक नजर जिने केला कहर
नजरेतून मिळालं नेमकं हवं उत्तर
अशी एक नजर त्यात फक्त कुतूहल
सारी गोड प्रश्नचिन्ह एकवटली क्षणभर
अशी एक नजर जिने केला कहर
"काय चूक झाली सांग ना ?" मागत राहते उत्तर
अशी एक नजर जिने केला कहर
दिसत नाही कुठे पण सगळीकडे वावर
अशी एक नजर डोळे लावलेली वाटेवर
जिच्यासाठी फक्त गाठावं वाटतं रोज घर
अशी एक नजर हरवलेली दूरवर
गहिऱ्या विचारांत गढून राहिलेली खोलवर
अशी एक नजर फिदा झालेली मरणावर
डाव आर्धा सोडत निघालेली सरणावर
अशी एक नजर जसं शून्य शून्यावर
उध्वस्त जग, एकाकी भकास स्वर
अशी एक नजर जसा शांतीचा सागर
जिला पाहता ऐकू येई अंतरातील स्वर
अशी एक नजर जिने केला कहर
भाषा साऱ्या शरण आल्या करताना भाषांतर
-कल्याणी बोरकर
Comments
Post a Comment